الكلمتين دول بيبحث عنهم ناس كتير نفسهم يعرفه ايه المطلوب لتجهيز مكان زي ده مع التبسيط والتيسر - طبعًا هتلاقي كتير على الشبكة العنكبوتية ما يخص تجهيز الاستوديوهات واحنا هنا بصدد تجهيز ستوديو للتسجيلات الاسلامية وده الهدف والنية من المقال ده لكن صعب يتوفر حد يديلك كل المعلومات بمصداقية وسهولة عشان تنفذ الفكرة من هنا كانت نيتنا ببساطة اننا نقرب ليكم الفكرة ونشجعكم لطالما العمل لله عز وجل 

بسم الله نبدأ 

كام نقطة لازم تركز عليهم قبل ما تبدأ تاخد أي إجراء
1- عشان التكلفة بلاش تروح تتعاقد مع شركة عزل الا لو كنت هتعمل ستوديو احترافي لانك هتسمع ارقام كبيرة
2- خد مقاسات الاوضة بتاعتك وياريت تختار اوضة ضيقة بعيد عن الشارع
3- العزل والتشتيت للصوت قبل اختيار المايك فلو انت في دور علوي بين دورين فالافضل تقيس السقف والارضية معاك
4- انزل السبتيه بالمقاسات اللي معاك واشتري الصوف الصخري كثافة 70 البالة ب425 وكثافة 100 البالة ب525 فيها سبع ألواح يفرشولك اكتر من سبعة متر
5- هات النجار النضيف وخليه يثبت الصوف الصخري بفريم خشب ولو محتاج صور للطريقة ابحث ع النت او انا ليا صور للاستوديو لو حابب اطلبها في الكومنتس
6- بعد تثبيت الصوف الصخري هيتم تجليد الغرفة بخشب MDF واللوح منه بـ 125 جنيه
الخطوات اللي فاتت دي عشان العزل التمام للاستوديو تدخل بقى في تشتيت الصوت
7- هتشتري الاكوستيك فوم اللي هو شكله اسود في الصورة ال16 قطعة ب220 جنيه
8- خطوة التنجيد وعمل كوبوتنيه كتير بيساعد معاك في التشتيت برضو
9- هتشتري مايك حسب إمكانياتك اللي اتجرب قدامي Rode Nt1 بـ4300 جنيه يعني فئة حلوة للبداية عشان متدفعش كتير - ممكن الـ Nt2 منه ف حدود 7000 جنيه انا لما جهزة اخترت Akg C214 ده سعره 9400 غير الملحقات بتاعته ( الفلتر + الحامل + الكابل الاوريجنال ) ودي اسعارهم بتبدأ من 700 مع بعضهم ل4000 جنيه براحتك مع كارت الصوت foucusrite
الجيل الثاني مثلا في سكة ٢٠٠٠ ج وده اللي هتلاقي فيه مخرجين للمايك ومخرج للهيدفون عشان تسمع صوتك وانت بتسجل مع الافكتات الجميلة بفضل اشتغل ببرنامجي FL Studio و Mix Craft
10- الهيدسيت يعني بلاش مبالغة قوي في انك تجيبون هيدفونايه تمنها 2000 جنيه في بيتك هات من الحاجات الجيمنج الي في السوق زي Sades مثلا وده محيطي كويس في حدود 300 ج
11- خطوة السماعات ( المونيتور ) أنا بستعمل ياماها 8 انش ودي سعرها وقت ما جبت من 6 شهور كان 12500 بس انت ال5 انش تكفي معاك في حدود 7000 جنيه ونقيه جدًا لو مش هتظبط ممكن تستخدم تايجر هوم سيتر في حدود 2500 هتأدي معاك الغرض
بس يا سيدي وسجّل حاجة تستفيد وتفيد الناس بيها بلاش تاخد الكلام ده وتشتغل مهرجانات سيدي الهليس ( أنا برئ منك  )